昏君校長不堪當領導人

另一在場人士來郵：

昏君校長和某幾個飯桶主任在7月20日同全體教師【玩遊戲】，我無冤枉佢哋，佢哋真係話【玩遊戲】，死未！開頭鹽庫一味解畫，解到一舊舊，昏君校長搶咪，輪到毒婁解畫，又解到一舊舊，跟住鹽庫又搶咪…爭個你死我活！

鹽庫話我哋啲手機號碼同哋址已經畀人公開左，一味靠嚇！我自己就估係圍內人做，同事之間有大家電話哋址幾咁奇？如果真係公開咗畀人知，又有乜用？我信得過呢個神秘人，目標只係針對昏君同一眾奸臣。正所謂「平生不作虧心事，半夜敲門也不驚」，不過佢哋做埋咁多虧心事就真係有排驚喇！之後鹽庫又話個網頁講嘅嘢係咩個人觀點，其實呢啲根本就係我哋平時谷埋谷埋又唔敢講嘅心聲！今次而家仲要打晒出黎大銀幕齊齊睇，真係大快人心！

鴨仔Sir搶咪扮專家，唔認入侵網頁，話係走去同網頁公司投訴，人哋15分鐘就做咗野喎。人哋係講究言論自由嘅美國，個網頁唔係非法野，人哋又要搵中文翻譯。你區區一個小學校長咁雞毛蒜皮（唔好意思，係「鴨毛蒜皮」），你投訴，人哋都未必睬你啦（引用網友「深水步陳敏之」留言）。我而家即刻開個網頁鬧衰布殊都仲得，邊個夠膽剷！你扮專家唔緊要，但唔好當人乜都唔識！呢啲唔關電腦知識事，只係Common Sense！點都好，鴨仔Sir已經間接認咗搞事，有冇人攞到餅錄音帶？快啲拎去做呈堂證供！

昏君校長話從來冇炒過任何人喎，你信唔信？之後諗諗吓又有，仲指名道姓話人點衰點衰所以先炒…唉，唔該你顧掂自己班馬仔先！你哋為咗幫自己狡辯，公開前同事私隱！又點計？

一陣間昏君校長又回應網頁指佢月薪十多萬銀両，人哋讚佢，佢又反咬人，指責報料人講嘢作大、造謠、誣蔑、不盡不實…總之無句好話讚吓人。佢仲孤寒到痺，應承在座咁多位文武大臣等到佢月薪十多萬銀両時，就請大家飲茶（Sorry係淨飲清茶一杯，冇話有嘢食喎）。哈！等佢請飲茶，不如聽乞米好過，佢咁嘅貓樣點搵月薪十多萬銀両？結果梗係引來全場噓聲，我仲掩住半邊嘴笑得最大聲添！

咦弊！唔記得咗我哋【玩遊戲】好鬼大陣仗，係全場錄影和錄音，畀佢捉到我笑嘅證據，就唔死都一身潺。不過又唔駛咁驚！萬一演技出眾，分分鐘畀昏君校長睇中。畀個奸妃角色我做，到時一埋到身，拋吓生藕，獻吓媚，露吓臍，低吓胸，出盡八寶，一爭到寵，上埋位，再做埋正印…今次仲唔要風得風、要雨得雨？

上半場悶到抽筋，等到頸都長，戲肉終於出場了，有得【玩遊戲】了，好開心呀！

點知原來唔係我哋【玩遊戲】，昏君校長和一班自己友玩晒，我哋只係做扯線公仔畀人玩，一陣要我哋「認同」嘅舉手，一陣又要我哋「唔認同」嘅舉手。我鬼知昏君校長有無做傷人害理啲嘢咩，叫佢老婆出來問吓佢咪得囉，關我哋鬼事咩！舉手定唔舉手，操控在昏君校長和一班自己友手中，佢哋話晒事，真係畀佢哋玩到手軟！

玩完一輪舉手遊戲，昏君校長話唔好玩，不如玩簽名遊戲，毒婁宣讀誓死詞，我哋個口要跟住毒婁讀誓死詞，宣誓完畢，人人要在誓約上簽名作實，無一倖免！

你哋知唔知【玩遊戲】時，昏君校長自嘲自己「行得正，企得正」，佢真唔知個「醜」字點寫。「平心不作虧心事，半夜敲門也不驚」，昏君校長，你半夜12點收到無聊電話，就驚到面青，如果半夜三更收到電話，咪驚到標尿！你一定係做得虧心事多啦，唔好姓賴，賴三賴四賴哋硬…

昏君校長，都怪鹽庫和毒婁兩大臣口不擇言，成日嚇你，話晒畀全朝文武百官聽。話你承受好大壓力，又話你無心情去旅行，唔係都講到係啦。一於燉佢哋冬菇！咪等佢哋講到眉飛色舞，自己就去泰國、歐洲、土耳其HAPPY！

遊戲經己玩完，到結局大家才知道是一個死亡遊戲！

昏君校長，你不得好死！逼所有教職員簽名支持你這個敗類，要我哋保證你人格。鹽庫之前都話網頁講嘅事，好多新嚟嘅同事都係唔知頭唔知路，班無知嘅小妹妹就話呃佢地幫你簽名啫。我哋呢班見你做盡壞事嘅人，唔踢爆你只係因為我哋厚道，畀你玩多幾年退休享清福。你而家咁，即係逼虎跳牆啦？

你有膽就叫埋所有離職員工陪你玩，你敢咩？你就係唔敢，驚爭取唔到更多支持者，仲怕畀人當眾爆晒你啲醜史，你身有屎！仲臭屎一籮籮！

各位受害者：現在網頁日日更新，昏君校長以前學校的教職員也在網頁上揭他的醜行，我哋怎能支持他，保證他的人格呢！現在補救為時未晚，大家表態吧！